About ATR-TL

Asosiasaun Turismu Relijiozu Timor-Leste nudar organizasaun inter-relijiaun Timor-Leste kompostu husi relijiaun Katóliku, Protestante, Musulmanu, Hindu no Kong Fu Chu nebe estabelese husi komunidade relijiozu sira atu kontribui hamutuk ba dezenvolvimentu turismu sustentável, partikularmente turismu relijiozu. Organisasaun ida ne,e primeiru hahu ho naran Rede Turizmu Relijiozu Timor-Leste nebe deklara nia ezistensia iha Loron 25 Marsu 2019 iha Salaun Conferensia Maubara Room, Timor Plaza. Organizasaun ne’e hari ho inisiativa husi líder relijiozu sira no hetan fasilita husi USAID Turizmu For All hodi tau liman hamutuk atu dezenvolve no promove atrasaun turístika relijiozu sira, no transforma ba produtu turismu hodi oferese ba merkadu ka indústria turismu.

Deklarasaun harií iha tempu Covid-19 ataka makas loos iha Timor-Leste no atividade rede Turismu Relijiozu maka halao orasaun husi relijiaun ida ba seluk no halibur aihan husi parseiru sira husi rai liur no rai laran hodi ajuda komunidade relijiozu sira nebe persija loos. E liu husi aitividade karitativa sira, enkontru no diskusaun lubun nebe halao to’o iha loron Quintafeira, data 19 de Novembru tinan 2020, realiza Asembleia Geral dahuluk ho theme “ fiar, paz, harmonia, fraternidade ” hodi legalisa estatuta no hari’i organisasaun ida ne,e no muda naran ba Asosiasaun Turizmu Relijiozu Timor-Leste.

Partisipantes Asembleia Jeral Asosiasaun Turismu Relijiozu Timor Leste (ATRTL) hamutuk ema nain 35 maka  kompostu husi :

  1. Deklarator hari’i ATRTL ema nain 5
  2. Representante husi relijiozu ema nain 5
  3. Representante husi (Hatubuiliku, Dili, Atauro) ema nain 6
  4. Representante akademisi (universidade 3) ema nain 6
  5. Representante empresariu turismu (kompania 3) ema nain 3
  6. Representante husi USAID ema nain 5
  7. Representante husi Ministeriu Turismu ema nain 2
  8. Representante Institusaun seluk ema nain 3

Asosiasaun Turismu Relijiozu Timor-Leste iha objetivu prinsipal dezenvolve turismu relijiozu Timor-Leste nebe’e riku ho valor relijiozu no úniku tebes. Asosiasaun ne’e komesa hahu’u estabelse wainhira halao mos Konferensia Internasional ba Destinu Turístiku Emerjente Daruak ba Turismu Relijiozu iha Fulan Maiu 2019.

Asosiasaun Turismu Relijiozu Timor-Leste hare katak, potensia ba atrasaun turistika turismu relijiozu sai nudar karaterístika únika Timor-Leste nian nebe’e marka diferensa ho atrasaun turismu relijiozu iha país sira seluk. Relijiaun iha Timor-Leste sai mos nudar kultura husi povu Timor, liu-liu iha prezervasaun serimónia relijiozu, no mos objetu sira hanesan Estátua sira, Igreja, Masjid, Templu no Vihara nebe’e hetan atensaun másima husi komunidade sira. Ho ne’e, Asosiasaun Turismu Timor-Leste iha hanoin atu hahu’u halao atividade sira nebe’e ligadu ho turismu relijiozu husi relijiaun sira hotu iha Timor-Leste ho atividade rutina sira nebe’e sempre halao tinan-tinan.